MSITU WA TEKETEA KWA MOTO MAKETE

Picha zikionesha moto ulivyoacha madhara makubwa kwa wenye misitu hii baada ya kuteketeza miti na mimea mingine iliyokuwa katika eneo hilo. Haijafahamika mara moja nini chanzo cha moto huo(PICHA ZOTE NA EDWIN MOSHI)

WANAOJISAIDIA OVYO MAKETE WAICHEFUA SERIKALI

Na Edwin Moshi, Makete

Serikali wilayani Makete mkoani Njombe imewataka wananchi kutoa ushirikiano wa pamoja kuwakamata ama kutoa taarifa kwa ngazi husika pindi wanapowaona watu wakijisaidia ovyo maeneo yasiyo rasmi.

Hayo yamesemwa na afisa afya wilaya ya Makete Bw Boniphace Sanga wakati akizungumza na mtandao huu na kuongeza kuwa kumekuwa na ongezako la magonjwa hasa ya kuhara ambayo yanatokana na watu wanaojisaidia ovyo na kuchafua mazingira.

Bw sanga amesema jukumu la usafi ni la kila mmoja na si la bwana ama bibi afya pekee na kwa kuwa wananchi ndio wanaoshinda maeneo mbalimbali wanawaona wale wanaojisaidia hovyo na kuomba watoe taarifa kwenye ofisi yake ili wachukuliwe hatua za kisheria.

Amesema inashangaza kuona hadi sasa wapo watu ambao hawana vyoo na wanaongoza kwa kuchafua mazingira kutokana na kujisaidia ovyo, na kutoa wito kuwa msimu huu ni wa kiangazi hivyo wanatakiwa kujenga vyoo kabla mvua haijanyesha.

"Kwa kweli natoa wito nyumba bila choo haijakamilika, acheni kun***a(akimaaisha kujisaidia) maeneo ambayo si kwa ajili hiyo, unakuta mtu kavaa vizuri lakini ni namba moja kujisaidia maporini, huu si ustaarabu na watu wa namna hii ndio wanaoleta magonjwa kwenye wilaya yetu.

Katika hatua nyingine Bw. sanga amewaomba wananchi kuendelea kujijengea utaratibu wa kutupa taka maeneo yanayoruhusiwa( kwenye vizimba vya taka) na kuwaasa kuacha tabia ya kutupa chupa za soda na maji mitaani kwani hatua kali za kisheria zitachukuliwa kwa watakaokamatwa.

SHULE YA MSINGI NKENJA MAKETE: INA HALI TETE!

Majengo ya shule ya msingi Nkenja, kulia na kushoto ni vyumba vya madarasa, katikati ni ofisi ya mwalimu mkuu.

Uongozi wa CCM wilaya ya makete ukishangaa kuona jinsi wanafunzi wanavyopata tabu kusomea kwenye pagale.

Madarasa ambayo hayajakamilika lakini yanatumiaka kwa ajili ya darasa la kwanza na la pili.

Turubai likining'inia kwenye chumba ambacho wanasomea wanafuzni wa darasa la kwanza na la pili ambalo hulitumia kama bati kuzuia jua.

Mazingira magumu hasa kwa elimu ya msingi nchini bado yanazidi kuonekana baada ya shule ya msingi Nkenja iliyopo kata ya Kitulo wilayani Makete mkoani Njombe kuonekana ina vyumba viwili tu vya madarasa ambavyo vina hadhi ya kutumiwa kama madarasa

Hali hiyo si imeacha hoi mtandao huu tu bali pia viongozi mbalimbali waliofanya ziara ya kukagua shule hiyo ambayo ilijengwa kwa makusudi ya kuwapunguzia wanafunzi mwendo mrefu wa kilomita 14 wanaotembea kwenda kusoma shule ya msingi Ujuni iliyopo kijiji cha jirani cha Ujuni

Mbali na shule hiyo kuwa na vyumba viwili vya madarasa, chuma kimoja wanasomea wanafunzi wa darasa la tatu na la nne kwa kuchanganywa pamoja, na chumba kimoja wanatumia darasa la tano tu peke yao

Hayo yamebainika baada ya ziara ya mwenyekiti wa CCM wilaya ya Makete Francis Chaula kufanya ziara katika shule hiyo kukagua hali ya ujenzi na maendeleo kwa ujumla katika shule hiyo ikiwa ni muendelezo wa ziara yake katika kata mbalimbali wilayani hapo

Viongozi hao wa CCM wamezidi kushuhudia maajabu katika shule hiyo kwa kujionea chumba ambacho wanasomea wanafunzi wa darasa la kwanza na la pili kikiwa hakina paa, bati wala sakafu ambapo wakati mwingine waalimu hukifunika kwa turubai ili kuwakinga na jua na wakati wa mvua havitumiki

"kama mnavyojionea ndugu viongozi wa CCM hali ni ngumu kwa kweli, tunaupungufu wa vyumba vitano vya madarasa, watoto wa darasa la kwana na la pili wanasomea kwenye chumba hiki ambacho hakina bati muda wote, wakati wa mvua hakitumiki kabisa, na wote tunawachanganya kwenye chumba hiki kimoja" alisema mwalimu mkuu Hester Mahenge

Viongozi hao ambao walikagua vyumba vyote vya shule hiyo pia waligundua shule hiyo ina upungufu wa madawati 50

Akizungumza shuleni hapo katibu wa CCM wilaya ya Makete Miraji Mtaturu amewapongeza wananchi wa Nkenja kwa kujitoa kwa gharama zao hadi hapo madarasa mawili yanayojengwa yalipofikia, na kuwaomba kushirikiana na kutilia mkazo suala hilo ili ujenzi huo ukamilike ndani ya mwaka huu

Amesema pamoja na wananchi hao kukabiliwa na michango mingi lakini watoe kipaumbele kwa ujenzi huo ili wanafunzi hao wasome kwa raha ukizingatia wanafunzi wanaosomea pagalani ni wa darasa la kwanza na pili ambao ndio wachanga wanaohitaji msaada kwa ukaribu zaidi

Naye mwenyekiti wa CCM wilayani hapo Francis Chaula amewataka kuandika bajeti ya vitu vinavyohitajika na gharama zake ili kukamilisha miradi hiyo na waipeleke kwa mkurugenzi mtendaji wa wilaya na nakala kwa chama chake ili kutilia mkazo zaidi namna ya kuboresha mazingira ya shule hiyo

Diwani wa kata ya Kitulo ilipo shule hiyo Mbosa Tweve amesema serikali kupitia halmashauri ya wilaya kwa bajeti ya mwaka wa fedha 2013/2014 imetoa sh. milioni 8 kwa ajili ya ujenzi wa shule hiyo na muda wowote kuanzia sasa zitapelekwa shuleni hapo na kuahidi kushirikiana kukamilisha ujenzi huo

baadhi ya wananchi wa kijiji hicho wamelalamikia michango ya ujenzi huo kuchangwa na kitongoji kimoja tu ilihali kijiji kina vitongoji vinne na kusema hali hiyo inachangia mradi huo kusuasua, huku hoja hiyo ikijibiwa na mwenyekiti wa kijiji hicho Zablon Chengula kuwa amesawaita wenyeviti wa vitongoji vyote kuzungumzia suala hilo na wapo wananchi ambao wameshapelekwa kwa mtendaji wa kata kushughulikiwa kutokana na kugoma kushiriki zoezi hilo

Shule hiyo ina madarasa matano (I-V) ina jumla ya wanafunzi 51 wanaofundishwa na waalimu watatu tu

 

Na Edwin Moshi, Makete

Katiba mpya: Wakulima wadai kupuuzwa maoni yako

Njombe

RASIMU ya katiba mpya imeingia doa baada ya wakulima kudai kuwa tume ya katiba ya Jaji wa Joseph Walioba imeyapuuza maoni yao.

Hoja hiyo imeibuliwa  katika mkutano  mkuu wa mwaka  wa muungano wa  vikundi vya wakulima  wadogo wadogo  nchini  (MVIWATA)  ambao umefanyika katika  mkoa wa Njombe.

Mkutano huo umehusisha   wanachama  na viongozi wa bodi Taifa wa MVIWATA kutoka  Kanda  sita  zinazojumisha mikoa yote ya Tanzania  bara , ambao ulilenga kuzungumzia maendeleo ya Mtandao kwa ujumla.

Mwenyekiti MVIWATA  Habibu Simbamkuti amesema, kuna mambo ambayo ni ya msingi yamepuuzwa katika Rasimu ya katiba mpya amabayo walianisha na kuwayawasilisha katika Tume.

Upande wao wakulima   wamesema,licha ya kuwepo vikwazo lukuki pia ushirikishwaji ni kitendawili kisichoteguka, kile kilichodaiwa kuwa mikataba ya uwekezaji katika sekta ya ardhi haihusishi maoni ya mkulima moja kwa moja na kusababisha migogoro kati yao.

Mjadala wa rasimu ya katiba mpya umehitimishwa mwishoni mwa wiki hii, ambapo maoni na mapendekezo ya kitaasisi yanawasilishwa kwenye tume ya Jaji  mstaafu  Joseph  Walioba  kabla ya kupeleka kwenye Bunge la katiba Novemba mwaka huu.

mwisho

ZIARA YA VIONGOZI WA CCM WILAYA YA MAKETE YAZIDI KUIBUA MENGI

Katibu wa CCM wilaya ya Makete Miraji Mtaturu (kulia) akizungumza katika ziara ya kukagua maendeleo ya shule ya msingi Nkenja wilayani Makete, kushoto kwake ni mwenyekiti wa chama hicho wilaya ya Makete Francis Chaula

Viongozi wa CCm wilaya ya Makete wakikagua chumba cha darasa wanachosomea wanafunzi wa darasa la tatu na la nne kwa pamoja

 Katibu wa CCM wilaya ya makete Miraji Mtaturu, mwenyekiti Francis Chaula na diwani wa kata ya Kitulo Mbosa Tweve wakisikiliza maelezo kutoka kwa mkuu wa shule ya msingi Nkenja Hester Mahenge ofisini kwake

 Viongozi wa CCM wakikagua ujenzi wa madarasa unaodaiwa kusuasua, mwenyekiti wa CCM wilaya ya makete (katikati) akizungumzia ujenzi huo

 darasa wanalotumia wanafunzi wa darasa la kwanza na la pili kusomea

 Turubai linalotumika kama bati kwenye jengo hilo

 Vyumba viwili vya madarasa ambavyo vinafaa kwa matumizi shuleni hapo.

(Picha zote na Edwin Moshi)

DK. MAHANGA ATEMBELEA VIWANDA, MASHAMBA YA CHAI NJOMBE

Naibu Waziri wa Kazi na Ajira,  Dk. Makongoro Mahanga (kulia) akioneshwa mitambo ya kuzalisha majani ya chai katika Kiwanda cha Chai cha Luponde, wilayani Njombe, alipofanya ziara ya kutembelea viwanda na mashamba ya chai  pamoja na kuzungumza na wafanyakazi. Kushoto ni Meneja wa Uzalishaji wa kiwanda hicho, Antony Mwai.

Naibu Waziri wa Kazi na Ajira,  Dk. Makongoro Mahanga akionja aina jibini (cheese) zinazozalishwa na Kiwanda cha Maziwa  cha CEFA Njombe, wilayani Njombe, alipotembelea kiwanda hicho hivi karibuni.

 Naibu Waziri wa Kazi na Ajira, Dk. Makongoro Mahanga (kushoto) akizungumza na Meneja Biashara wa Kiwanda cha Chai Luponde, Athanas Mwasamene alipotembelea hivi karibuni  shamba la majani ya chai-dawa (herbal tea) wilayani Njombe. Dk. Mahanga alifanya ziara wilayani humo ambapo alitembelea viwanda, mashamba ya chai pamoja na kuzungumza na wafanyakazi.

 Meneja Uzalishaji wa Kiwanda cha Chai Luponde, wilayani Njombe,  Anthony Mwai (mbele) akimwonesha Naibu Waziri wa Kazi na Ajira, Dk. Makongoro Mahanga (katikati), shehena za chai-dawa (herbal tea) zinazozalishwa kiwandani hapo, tayari kusafirishwa kuuzwa nje ya nchi. Dk. Mahanga alifanya ziara wilayani humo ambapo alitembelea viwanda, mashamba ya chai pamoja na kuzungmza na wafanyakazi.

CHANZO: MICHUZI BLOG

MKUU WA WILAYA YA MAKETE AWATAKA NLC KUMALIZA TOFAUTI NA KKKT KATIKA WILAYA HIYO.

NA James Festo, Makete

Mkuu wa wilaya ya makete bi. Josephine matilo amewataka viongozi wa dhehebu la kanisa la kiinjili la kilutheli KKKT Dayosisi ya kusini kati kumaliza tofauti zilizopo baina yao na viongozi wa huduma ya maisha mapya ndani ya kristo NLC wilayani hapa.

Ameyasema hayo akiwa mgeni rasmi wakati wa kufungua mkutano wakuelekea kilele  maadhimisho ya miaka hamsini ya huduma hiyo ya maisha mapya ndani ya kristo ambao utadumu kwa siku saba ambao unafanyika  katika viwanja vya mabehewani kijiji cha iwawa  na kuwataka kudumisha amani na mshikamano ili kuweza kuyafikia malengo yao.

'viongozi tunakaa tunarumbana tunawapotosha wananchi tukae meza moja ili kuweza kumaliza tofauti zetu na si kuendelea kila watu kivyao hapo mnawaumiza  wananchi sote mungu wetu ni mmoja malumbano  yanatoka wapi?' aliuliza bi matilo.

Aidha mgeni rasmi huyo bi matilo ameeleza kuitambua huduma hiyo na kuwashauri viongozi na kuwataka kueneza dini jinsi katiba yao inavyosema  bila ya kuvunja katiba ya jamhuri ya muungano wa tanzania

sisi kama serikali tunatambua huduma yenu na tunataka injili ifike kila mahala  kwa jinsi mlivyoyaainisha malengo yenu ya kuweza kuimarisha amani na utulivu kwa wananchi na hatutakaa kimya kama kuna kanisa linapotosha wananchi  alisema bi matilo.

kwa Upande wake katibu mkuu taifa  wa huduma hiyo bw. Daimon Mwandambo wakati akisoma risala kwa mgeni rasmi alisema kwa huduma hiyo imesambazwa katika mikoa 18 ya tanzania bara na kuufanannisha utofauti huo na uliowahi kujitokeza jijini dar es salaam na ule wa mkoani iringa ambao ulidumu kwa miaka saba.  

CHANZO: JIACHIE BLOG

Mkutano huo utakaodumu kwa siku saba ambapo kilele cha maadhimisho hayo yatakuwa septemba 13 na mkutano mkuu kitaifa utafanyika mkoani morogoro pia katika ufunguzi huo  ulilhudhuliwa na viongozi mbalimbali wa huduma hiyo  wakiwemo uongozi wa mkoa serikali akiwemo mwenyekiti wa halmashauri bw daniel Okoka na mwakilishi wa mkurugenzi bw. jakob mena, viongozi siasa nawageni wengine waalikwa.  

MWANAFUNZI ALAZIMISHWA NGONO BILA KONDOMU NA MAJANGA MENGINE WILAYANI MAKETE

Kata ya Iwawa ilipo shule hiyo.

 

Na Edwin Moshi wa Globu ya Jamii, Makete

Wafunzi wa shule ya sekondari Iwawa wilayani Makete mkoani Njombe wamekiri uwepo wa wanafunzi wenzao ambao wanajihusisha na vitendo vya ngono na wengine wanaishi na virusi vya UKIMWI, licha ya jamii kudhani kuwa wanafunzi hawawezi kuwa na virusi hivyo kwa minajili kwamba bado ni wadogo.

Hayo yamebainika baada ya mtandao huu kufanya mahojiano ya kina na baadhi ya wanafunzi wanaosoma shuleni hivi karibuni kwa ruhusa ya mkuu wa shule hiyo Bw. Christopher Haule hapo kufuatia wananchi wengi wilayani hapo kudhani kuwa wanafunzi hao hawana maambukizi ya vvu kwa kuwa ni wadogo na huwenda hawajaanza kujihusisha na vitendo vya ngono. Mwanafunzi mmoja (jina linahifadhiwa kwa sababu za kimaadili) amesema ana marafiki zake zaidi ya watano ambao wanaishi na virusi vya UKIMWI na hajui walivipataje, hivyo anaamini wapo wanafunzi wengi ambao wana maambukizi.

Amesema jamii inapaswa kuondokana na dhana potofu kuwa mabinti ama vijana wadogo hawana vvu waache mara moja kwa kuwa virusi vinampata mtu yeyote bila kujali umri.

“Mtu anayedhani kuwa wanafunzi huwa hawana vvu ni uongo, na pia waanatakiwa kuacha kujihusisha kimapenzi na wanafunzi kwa madai kuwa hawana vvu, lakini wakumbuke sheria za nchi haziruhusu kujihusisha kimapenzi na wanafunzi, jamani Ukimwi upo kwa kila mtu” alisema mwanafunzi huyo. Mwanafunzi mwingine amesema yeye hafahamu kama wanafunzi hao wenye vvu wanajihusisha kimapenzi na watu kwa kuwa wapo ambao wanaishi na wazazi wao na wengine wamepanga kwenye nyumba maarufu kama mageto ambao kwa kiasi kikubwa wako huru kufanya mambo yao kwa kuwa hawana muangalizi. “Ni kweli kabisa wapo wanafunzi wenye vvu wanaoishi wenyewe kwenye mageto, lakini mimi sijui kama wana wapenzi ama lah, maana ni ngumu kujua na mimi sipo hapa kwa ajili ya kufuatilia maisha ya mtu, na hao ninao kwambia kwa kuwa ni marafiki zangu na waliwahi kuniambia kuwa wanaishi na vvu” alisema mwanafunzi huyo(jina tunalo)

Mmoja wa mwanafunzi aliyezungumza na mtandao huu

 

Mwanafunzi upande wa kushoto wa picha hii amemweleza mwandishi wetu kuwa mpenzi wake anamlazimisha kufanya mapenzi bila kondomu

 

“Mimi kwa upande wangu Kusema kweli nina mpenzi na nilishawahi kupima vvu mwaka jana (2012) na kujikuta sina maambukizi namshukuru Mungu kwa hilo, na pia nimekuwa nikifanya mapenzi kwa kutumia kondomu lakini kuna wakati mwingine hatutumii mimi na mpenzi wangu na mara nyingi yeye ndiyo ananishawishi tusitumie, na huyo mpenzi wangu si mwanafunzi ni jamaa tu wa pale mtaani kwetu, na mimi huwa nakwenda home kwake(Nyambani kwake) na wakati mwingine anakuja geto kwangu, ili atumie kondom huwa namwambia leo ni siku zangu za hatari, hapo ndipo atavaa kondomu” alisema mwanafunzi huyo wa kike ambaye anaishi kwenye nyumba ya kupanga. Akizungumzia suala hilo, diwani wa kata ya Iwawa Benjamin Mahenge alikiri kuwepo kwa tatizo la ukimwi kwa kila mtu, na kuongeza kuwa hata wanafunzi wapo wenye vvu ingawa ni kwa kiasi kidogo ukilinganisha na miaka iliyopita na pia wapo wanafunzi wanaojihusisha na vitendo vya ngono, na ambao wameshabainika wamefikishwa kwenye vyombo vya sheria

Diwani wa kata ya Iwawa Benjamin Mahenge (kushoto) akizungumza na mwandishi wa habari hizi

"Unajua ni ngumu mwanafunzi kuniambia mimi ama kiongozi mwingine kuwa anajihusisha kimapenzi na mtu lakini kwako mwandishi kasema, mimi ninaomba wawe wawazi ili tuweze kuwasaidia hasa pale linapojitokeza tatizo hasa mimba kwa kuwa hawawataji wahusika" alisema Mahenge

Mahenge amesema huu ni muda wa jamii kubadilika na kuondokana na dhana potofu kuwa wanafunzi hawawezi kuwa na vvu, na pia wawaache wanafunzi hao wasome na si kuwarubuni na kujikuta wakifanya nao mapenzi Pia amesema wapo wanafunzi katika kata yake ambao wamepanga na uangalizi wao si mzuri kwa kuwa wanajiamulia mambo yao wenyewe hata kama si mazuri kutokana na kukosa uangalizi wa watu wazima.

 “Unakuta mwanafunzi kajipangia kwenye chumba chake, yeye ndio kila kitu, akitaka kusoma haya, akitaka kwenda disco hakuna wa kumuuliza, hii ni hatari pia” alisema Mahenge

 

 Moja ya nyumba iliyoko Makete mjini amayo wanafunzi wamepanga

 

Kwa Hisani ya Edwin Moshi

MKUU WA WILAYA WA MAKETE ATAKA ELIMU YA VVU IENDE PAMOJA NA UJASILIAMALI

 Mkuu wa wilaya ya Makete Josephine Matiro ambaye alikuwa mgeni rasmi katika ufunguzi wa mradi huo ngazi ya wilaya akisikiliza maelezo ya mradi huo kutoka SUMASESU

 Mkurugenzi wa shirika la SUMASESU Egnatio Mtawa akitoa maelezo kwa washiriki kuhusu utambulisho wa mradi uitwao "Vijana wa makete na mapambano dhidi ya maambukizi mapya ya virusi vya Ukimwi" katika ukumbi wa HIMA Makete wakati wa utambulisho wa mradi huo ngazi ya wilaya Augusti 09, 2013. Shirika la SUMASESU ndilo litakalotekeleza mradi huo kwa ushirikiano na UNICEF

 Washiriki wakisikiliza maelekezo kutoka kwa mkurugenzi wa SUMASESU (hayupo pichani)

 Mratibu wa ukimwi halmashauri ya wilaya ya Makete CHAC Ester Lamosai(kushoto) akiwa na Anifa Mwakitalima kutoka SUMASESU

Mtaribu wa ukimwi sekta ya afya (DAC) Dk Shadrack Sanga akichangia hoja kwenye kikao hicho

 Mkuu wa wilaya ya Makete Josephine Matiro akitoa hotuba yake wakati wa ufunguzi wa mradi huo ngazi ya wilaya katika ukumbi wa HIMA Makete

Makamu mwenyekiti halmashauri ya wilaya ya Makete Jison Mbalizi akiahirisha kikao hicho

***********************888888

Na Edwin Moshi, Makete 

Wadau wa mapambano dhidi ya virusi vya Ukimwi kwa vijana wilayani Makete mkoani Njombe wametakiwa kutoa elimu hiyo sanjari na elimu ya ujasiriamali kwa pamoja kwani kwa kufanya hivyo kutasaidia kupunguza ongezeko la maambukizi ya ugonjwa huo kwa kasi zaidi

Rai hiyo imetolewa na mkuu wa wilaya ya Makete Josephine Matiro wakati akifungua mradi wa vijana wa Makete na mapambano dhidi ya UKIMWI uliozinduliwa Ijumaa Agosti 9, 2013 ngazi ya wilaya, mradi ambao utatekelezwa na shirika la sumasesu kwa ufadhili wa UNICEF

Matiro amesema vijana wengi wamekuwa wakipatiwa elimu hiyo ya namna ya kujilinda na maambukizi mapya ya vvu na baada ya hapo wanakosa kazi ya kufanya hivyo kuwa rahisi kwao kujiingiza kwenye vitendo vitakavyowasababishia kupata vvu

"Kijana anapewa elimu sawa lakini hana cha kufanya mwishowe akija mtu wa kuwarubuni hasa kifedha wanaingia kilaini kwa kuwa hana shughuli yeyote inayomuingizia kipato, mwishowe anaweza kupata vvu"alisema Matiro

Amewataka vijana kujiunga na vikundi mbalimbali ili waweze kupatiwa mikopo nafuu kwa ajili ya shughuli hasa kilimo kwa kuwa wakishajiunda na kutoa taarifa yeye kwa kushirikiana na halmashauri watawasaidia kupata mkopo ambapo wakati huo huo wakiwa na shughuli ya kufanya halafu wakapata elimu ya kujikinga na vvu itakuwa bora na yenye manufaa kwao

Wadau walioshiriki katika kikao hicho kilichofanyika kwenye ukumbi wa HIMA Makete akiwemo mratibu wa ukimwi sekta ya afya (DAC) Dk Shadrack Sanga amelitaka shirika hilo wakati wa kutekeleza mradi huo watoe elimu ya tohara kwa vijana wa kiume ambapo akiwataarifu wao kama idara ya afya wako tayari kuungana nao jambo lililoungwa mkono na kaimu mganga mkuu Boniphace Sanga ambaye alikuwepo kwenye kikao hicho

Kwa upande wao shirika la SUMASESU kupitia kwa mkurugenzi Egnatio Mtawa alipongeza kwa ushirikiano uliooneshwa na wadau wote huku akimuahidi mkuu wa wilaya kuwa wataingiza mada ya ujasiriamali wakati wakitoa elimu ya ukimwi kwa vijana ili iwasaidie huku akiahidi kushirikiana na kila wahusika ili mradi huo ufanikiwe

Mradi huo utakaotekelezwa hadi Julai 2015, utahusisha kata za Ipelele, Iniho, Iwawa, Isapulano na Kitulo